អដ្ឋ

Number eight

បា. សំ.(ប. សំ.) (អឞ្ត) ប្រាំបី (៨) ។ អដ្ឋង្គិក (អ័ត-ឋ័ង-គិ-កៈ; បា. < អដ្ឋ “ប្រាំបី” + អង្គិក “ដែលមានអង្គ”) ដែលមានអង្គ ៨, សម្មាមគ្គ (មើលក្នុងពាក្យ សម្មា) ។ អដ្ឋង្គិកសីល សីលមានសិក្ខាបទ ៨ (សីល ៨) ។ អដ្ឋង្សៈ (អ័ត-ឋ័ង-សៈ; បា. អដ្ឋំស < អដ្ឋ “ប្រាំបី” + អំស “ភាគ; ជ្រុង; ភាគនៃមុម”) ដែលមានភាគឬជ្រុង ៨ (ប្រាំបីភាគឬ៨ជ្រុង) ។ អដ្ឋទិស ទិសប្រាំបី ។ អដ្ឋបទ (–បត់) ដែលមានជើង ៨ (ក្តារចត្រង្គឬក្តារបាស្កា; ល្បែងចត្រង្គឬបាស្កា ជាដើម) ។ អដ្ឋរស្ស (–រ៉ស់) ប្រាំបីជ្រុង : វិហារអដ្ឋរស្ស ឈ្មោះវិហារមួយធំលើភ្នំព្រះរាជ្យទ្រព្យ (ក្រុងឧដុង្គមានជ័យ; អ្នកខ្លះធ្លាប់សរសេរជា អដ្ឋារស “១៨” ឥតពាក្យថា “ជ្រុង”) ។ អដ្ឋស័ក ស័កទី៨ នៃឆ្នាំ ។ អដ្ឋសិក្ខាបទ ឬ–សីល សិក្ខាបទឬសីល៨ (អដ្ឋង្គិកសីល) ។ល។